الرئيسيةس .و .جبحـثالتسجيلدخول

شاطر | 
 

 كيف تعرف أنك في فيلم عربي ؟؟؟؟

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ExtraGeniusKareemkhaled
مهندس عبقري
مهندس عبقري
avatar

عدد الرسائل : 213
العمر : 29
الموقع : http://www.extratechnology.co.uk/
تاريخ التسجيل : 24/05/2008

مُساهمةموضوع: كيف تعرف أنك في فيلم عربي ؟؟؟؟   الثلاثاء يوليو 08, 2008 12:33 am

ساعت بنلاحظ واحنا نشاهد الافلام العربية وخاصة القديمة بعض التفاوتات اللى تشلنا واحنا قاعدين و تدل على تاخر السينما المصرية وضعف المخرجين و دى بعضهم :

1- لما تلاقي البطل اتضرب واتعور وفي المشهد اللي بعده تلاقيه خف بسرعة خرافية (جسمه بيلتئم بسرعة غير الناس العادية مش البطل برضه).

2- مفيش حد بيشرب كباية المية للاخر أبداً مهما كان درجة عطشه فى الفيلم (الخمرة دايما بتتشرب لاّخر نقطة).

3- مفيش حد بيقفل عربيته خالص دا على إعتبار إن البلد أمان ومحدش بيسرق عربيات خالص.

4- فى أى فيلم كوميدى أو مشهد كوميدى إستحالة تلاقى حمام سباحة من غير ما أى حد يقع فيه وغالبا بيبقى البطل.

5- بطل الفيلم البنات بتدوب فيه ومقطعين بعض عليه يعينى من غير أى سبب غير أنه البطل (وساعات البطلة ).

6- لما بيخرج البطل بليل مثلا فجأة تلاقيه مثلا وصل المكان اللى رايحله بقى بنهار إزاى متعرفش (الظاهر انه بيمشى فى الجزمة الأول).

7- نفس الموضوع تقريبا تلاقيه خارج بهدوم ووصل المكان بهدوم تانية خالص (ممكن يكون معاه غيار إحتياطى لأى ظروف).

8- تلاقى البطلة مش لاقية تاكل وحالتها بؤس وشقاء وحياتهم ضنك ومع ذلك لابسة هدوم مفيش بالشىء الفلانى وحاطة مكياج وشعرها لسة جاى من الكوافير ( الأناقة برضه يجماعة أهم حاجة).

9- الممثلات فى الأفلام بيصحوا من النوم شعرهم متسرح ومتوضب وعلى سنجة عشرة وفى نفس الوقت تلاقيها حاطة مكياج (جميلة على طول ).

10- فى المطاردة بين العربيات تسمع صوت الكاوتشات على الطريق والفرامل برغم ان العربيات أساسا ماشية بسرعة ربع كيلو فى الشهر.

11- صوت الضربة تلاقيه كأنه صوت حلل بيخبط (الظاهر أن اللى بيضربوا وبيتضربوا مش بنى أدمين زينا).

12- فى ضرب النار تلاقى المسدسات والأسلحة مش طالع منها ولا حتى ربع ملى شرارة نار( ملعش أصل دى أسلحة حديثة برضه مش زى بتوع هوليود الجهلة).

13- الشرير فى الأفلام العربى هو شرير كدة وخلاص أتولد شرير وعاش شرير وبيحب للناس الأذية وشكله أساسا مكتوب على وشه بالبنط العريض شرير ولو شفته فى الشارع هتعرف انه شرير إيه السبب مفيش سبب غير انه الشرير وخلاص.

14- لو البطل بيحب واحدة متجوزة مثلاً يبقى أكيد أكيد هيبقى جوزها دا شرير ( تاجر مخدرات , حرامى , نصاب , ويمكن يبقى جاسوس لو المخرج عاوز ومش بعيد يطلع بيخونها).

15- البوليس بييجى بعد ما الجريمة فى أى مكان من غير ماحد بيلغ ولا حاجة تقولش بيشم ريحتها (شايف كفائة جهاز الشرطة المصرى؟؟!).

16- الأطفال المصريين فى الأفلام عندهم وعى وطنى كبير يعنى تلاقى مثلا طفل عنده أربع سنين بيقولك عاوز أكبر وأشتغل عالم كبير علشان أنفع وطنى مصر اللى شربت من نيلها وأتربيت تحت سماه ...إلخ إلخ مع العلم أساسا أنه فى الحقيقة الكبار نفسهم مش عارفين هم عاوزين إيه.

17- غالباً البطل لما بيتعاون مع المجرم أو يمشى فى طريق غلط تلاقيه كان أساسا متفق من البوليس فى الموضوع دا (شوف إزاى بقى أحنا كنا مخدوعين...!!!).

18- لازم البطلة تبقى مظلومة والناس فاهمينها غلط يعينى حتى لو كانت رقاصة (وماله الرقص مهنة شريفة برضه).

19- البطل عمال يضرب فى الناس يمين وشمال وبيقول يأرض أتهدى ماعليكى قدى وهو أساسا عنده جفاف وهيموت أهو.

20- سنيد البطل لازم يبقى غبى وساذج وأهطل وملوش أى معنى موجود وخلاص .

21- لازم البطل والبطلة يتجوزوا فى الاّخر وخلاص.

22- الشرير بيحارب البطل طول الفيلم لله فى لله وخلاص وغالبا الشرير لو كان شرير بيئة بيكون أخد له ضربة مطواة ولا سكينة فى وشه .

23- بتلاقى الأبطال (لو كان الفيلم مش كوميدى) قمة الذكاء والجمال ومبيغلطوش أبدا هم صح على طول تحس أنهم ملايكة مش بشر زينا الناس اللى فاهماهم غلط وخلاص.

24- لما تلاقى الممثلة عدت سن الستين ولسة جاية فى دور طالبة فى الجامعة أو أحياناً الثانوية العامة.

25- لو حاولوا وجابوا شخصية تانية مثلا للبطلة أو البطل فى طفولته وبعدين ممثل تانى لمرحلة الشباب وتالت لمرحلة السن الكبير مثلا تلاقى فيه حاجات غريبة بتحصل مفيش أى تشابه بين الثلاث ممثلين فى الشكل يعنى ممكن تلاقى البطلة وهى صغيرة مثلا عنيها زرقاء كبرت عنيها بقت خضراء لما كبرت اوى عنيها أسودت (خلى بالك مش عدسات لأن فيه حاجات من دى قبل زمن العدسات).

26- لما تلاقى البطل متنكر يبقى حاطط دقن وشنب (تنكره فظيع) لدرجة أنك عرفته اول ماشفته وأمه وأبوه وأخواته ومراته او حبيبته مش عارفينه (يمكن الفيلم كان بيحكى عن أرض العميان ).

27- فى غالبية الأفلام (والحمد لله الموضوع دا قل كتير بجد) لازم تلاقى رقصة شرقية ليه وفين وإزاى المهم تبقى موجودة وخلاص.

28- أما تلاقى البطل والبطلة حبوا بعض وبرضه صديق البطل وصديقة البطلة حبوا بعض (شوف الحلاوة ).

29- لما تلاقى الصدف كتير أوى فى الفيلم يعنى ساعت بتبقى معقولة أحييانا بتبقى من سبعين إلى ثمانين صدفة بس.

30- لما تلاقى الأبطال راحيين جايين من شرم الشيخ للغردقة والقاهرة وإسكندرية وبيظهروا فى الفيلم الصبح وبليل وكل يوم وهم رايحين مع البطلة وجايين معاها وبيحصلهم المواقف الخاصة بالفيلم مع عدم ذكر مواعيد البطل يكون رايح شغله مثلا فيها (هم كلهم عالم فاضية ولا الأفلام بيصوروها فى وقت فراغهم ولا احتمال يكون كل الأيام عندهم جمعة وسبت).

31- أى بطل يسافر برة مصر لازم يرجع أخر الفيلم (بعد شهر ولا أثنين) ويكون بقى مليونير وغنى ومعاه فلوس هم برة بيوزعوا فلوس على المهاجرين والمسافرين ولا إيه.

32- لما تلاقى الممثل جايب إبنه علشان يمثل معاه.

33- أن حاجات كتير تحصل ملهاش أى سبب غير أنك تفسرها أن المخرج عاوز كدة.

34- وأخيراًو ليس أخرا أنك لو قعدت تكتب فى عيوب الافلام مش هتكفيك مجلدات ضخمة بس كفاية كدة أوى النهاردة.


ملاحظة هامة: هذا لا يمنع وجود بعض الأفلام العربية الرائعة والجميلة للغاية ولكنها للأسف قليلة وهذا هو حال غالبية افلامنا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.facebook.com/profile.php?id=728940942
al_shama
ضيف شرف عظيم
ضيف شرف عظيم
avatar

عدد الرسائل : 498
تاريخ التسجيل : 26/04/2008

مُساهمةموضوع: رد: كيف تعرف أنك في فيلم عربي ؟؟؟؟   الإثنين يوليو 14, 2008 12:08 am

هههههههههههههههههههه
لا حلوة دي بقى يا باشا
شكـــــــــــــــــــــــــــــرا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
AL Lo2lo2a
مهندس جامد
avatar

عدد الرسائل : 52
العمر : 26
تاريخ التسجيل : 13/07/2008

مُساهمةموضوع: رد: كيف تعرف أنك في فيلم عربي ؟؟؟؟   الإثنين يوليو 14, 2008 8:39 pm

دى علامات الجودة فى الافلام المصرية
بس الموضوع جامد جدا يا باشمهندس كريم
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
كيف تعرف أنك في فيلم عربي ؟؟؟؟
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
هندسه زراعيه عين شمس  :: افتكاسات :: نكت وافاشات-
انتقل الى: